Poetry: "Soy es una kerida" (1)

by Vea Lovino

Kung sa Espanya ako isinilang

marahil ay masarap pakinggan

ang taguri sa akin ng karamihan

lalo na kung sa iyo mapakikinggan.

Binibining iniibig

sintang pinili mong makaniig.

Tinitiis ko ang sakit

ang matatalim nilang titig.

Sa madlang kamalayan,

ako si Bea, ako si Anne.

Sa paningin ng kababaihan

isa akong kalaban.

Miniskirt, pulang lipstick

kurbang balakang,baywang na nahahapit

katawan ko raw sa iyo ay langit

apoy na sa iyo ay liligpit.

Laging ganito ang nasisilayan

sa telebisyon at pahayagan

isa akong dagok, isang kamalasan

sa pamilya'y isang kasiraan

Ngunit paano kung ang pag-ibig

ay may ibang iginuhit

Paano kung ang miniskirt at pulang lipstick

ay suot ng iyong misis

Paano kung ang nag-astang Bea at Anne

ay ang iyong ginang

at ang katawang pinagpapantasyahan

ay nasa kanya ngunit sa iba'y inilaan?

At akong iyong inibig

sintang namalas ang 'yong sinapit

dumamay sa iyong sakit

ang siyang umani ng matalim na mga titig.

Babe, naging bebe nang kinalaunan.

Iyan ang malambing kong pangalan

para sa iyo na ginawan mo ng tahanan

si Honey ay iyong pinalitan.

Pero sa oras na ikaw ay umalis

sa bagong lugar ma'y walang nakababatid

ramdam ko pa rin ang pang-uusig

sa mga gaya kong bisyo nilang i-tsismis.

Kung ako lamang sana'y pupuntahan

ng reporter at cameraman

ibang imahe ang kanilang masisilayan

nakadaster na Bea, nagwawalis na Anne.

Ngunit baka hindi sila makinig.

Baka bukas makakakita na ako ng ngiting pilit

at lumalayong mga kabaranggay, nagpaparinig

mauulinigan ko lang ang salitang kabit.

Pero kung sa iyo ko mapakikinggan

na ako'y iyong kerida ako'y masisiyahan.

Ang babaeng iyong piniling samahan

sayang at hindi mo napakasalan.

(1) The different spelling of "kerida" is artistic license

* * * * * *

ABOUT THE AUTHOR

Vea Lovino is currently an online content writer and part-time entrepreneur. She is 25 years old and a dropout of a university in Quezon City. She is compiling her poems about love and hopes for future submission in various publications. She also contributes erotic romance and nonfiction entries in various blogs and websites.